:: علشان خاطرى ::
*****************
Mohammed Abo Elhassan
وبما إنك دى الوقتى بتبكى
وعلى فراقها للدنيا بتشكى
فنصيحة عشان خاطر قلبك
إنسى وحاول تعدم حبك
--------------
Ahmed Gomaa
مش هقدر أنساها يا صاحبى
لو هفضل طول عمرى أنا هبكى
مش رح أنسى أبدا حبى
ولا هقدر للحزن أخبى
-------------
Mohammed Abo Elhassan
هى خلاص حضنها مش ملكك
وإنت تملى معروف إنك
فى التضحية مافيش أكرم منك
هى صحيح الفرقة عذاب
بس الأصعب منها ياصاحبى
إنك تعشق وعارف إن عيونها
بتحكى غرام كذاب
------------
Ahmed Gomaa
عارف إنك خايف
أكتر منى ياصاحبى عليا
عارف إنك خايف أضيع
لأ دا أنا خايف أكتر منك
أيوه ياصاحبى الفرقة عذاب
بس غرامها مش كداب
-----------
Mohammed Abo Elhassan
وإنت بطيبتك ولا هتسيبها
ولا هتحاول يوم تحسبها
إنك لا قدرها ولا نصيبها
وإنك لسه العمر بحاله
مرسوم فرحة ولابسة الطرحة
وإنت حبيبها
-------------
Ahmed Gomaa
مش بالطيبة أنا قلبى حاببها
فعلا أنا مش هقدر أسيبها
عارف إن نصيبها لغيرى
وإنى عمرى ما كنت نصيبها
وبعد دا كله برضه حاببها
باقى العمر أنا خايف منه
حاسس إنه عذاب من غيرها
--------------
Mohammed Abo Elhassan
علشان تنسى
فاكر يوم ما نصحتك تنسى
وقولتلى صعب
لأ مش صعب
علشان تنسى حبيبة بعيدة
لازم تبدأ قصة حب
وما تقوليش ماأقدرش ولا أرضى
ولا تقوليش إنك لو تبعد عنها
بتبقى مريض من ضمن المرضى
------------
Ahmed Gomaa
النسيان آه صعب عليا
بس اللى مصبرنى شويه
إنى ف قلبها جوا منها
وإنها عرفت إنى حاببها
---------------
Mohammed Abo Elhassan
طب ماسألتش نفسك مرة
وإنت بتحلم بيها وهايم
قايم نايم تحلم بيها
وتحلم إنك ماسكة إيدينك
كف إيديها بتدفيها
إيه اللى بيلمع دا فى صوابعها
طبعا عارف بس بتحلم
إن الدبلة دى تبقى بتاعتك
وإنك تبقى الحرف المكتوب
بين الدبلة وبين صوابعها
------------
Ahmed Gomaa
عارف حتي إنها مش ليا
وإن فرحها جي قريب
وهتبقي ملكه وعشانه
وإنك خايف علي قلبى الطيب
ليضيع عمره فى لحظه قصادها
وإنت نصيحتك غالية عليا
-----------
Mohammed Abo Elhassan
طيب إحلم
وإنت بتحلم عايزك تعرف
إن فى لحظة حلمك بيها
هى فى حضنه
وهى خريفه وهو ربيعها
وإياك تزعل
خوفى عليك خلانى أتنرفذ
وإسمع منى أنا آخر كلمة
م اليوم دا أنا هتحكم فيك
وإنت بكل بساطة تنفذ
-----------
Ahmed Gomaa
وإنا والله نفسي أسمعلك وأنفذ
وعارف حبك ليا خلاك تتعصب تتنرفذ
بس يا صاحبى قلبى تاعبنى
والدنيا كدا جايه عليا
كان حبها أجمل أمنية
عايش علي أمل إنى ألقاها
لو حتي يكون بعد سنين
نفسى لحظة أبقى معاها
علشان خاطرى بلاش تتنرفذ
--------------
Mohammed Abo Elhassan
لا هتنرفذ
ومن دى الوقتى لابد تنفذ
وإبعد عنها .. فـ تبعد عنها
سيبك منها .. تسيبك منها
وتبدأ تحلم حلم عشانه
تعيش فى الدنيا سعيد متحفز
------------
Ahmed Gomaa
عارف قلبى مبينساش
ولا حتي برضه هيتغير
لا أنا عايز أنسى ولا أبعد
ولا حتى أبقى سعيد متحفز
عارف أكتر حاجة فى قلبى بتريحنى
إنك صاحبى دايما جمبى
والحاجة اللى أنا مش هنساها
إنك أكتر أخ فى قلبى
أحمد جمعه
محمد أبو الحسن
2015/3/24
ليست هناك تعليقات:
إرسال تعليق