-- (( حتة من الجنة )) ---
************
بفتكرها فى كل ضيق
لو يتوه منى الطريق
او تضيع احلامى منى
وابقى محتاج للصديق
هى امى
وهى خالى وهى عمّى
وكانت شايله ليلاتى همّى
عايشه دايما جوه روحى
وف وريدى ويّا دمّى
كل يوم تمسح جبينى
وبآسامى الله تسمّى
ولو تشوف العيبه منى
تدارى وفى العيون تغمّى
وكل حلو يكون فى إيدها
بعد ثانيه يكون فى فمّى
وبشقاوتى كنت ابعتر
وانتى يا امى تلمّى
لما كنت بطيشى ابعد
كنتى بحنانك تضمّى
----
لما كنتى بتقصدينى
وكنت اميّل
كنت بدلّع عليكى
كنت حاسس بين اديكى
إنى عيّل
كنت بهرب من عتابك
لو تعاتببنى فى رزالتى
وارجع اتمسّح ببابك
كنت عارف ايه غلاوتى
كنت بتدفى ف حنانك
وانتى قبلانى بقساوتى
لو يعود العمر تانى
لو دقيقه او ثوانى
لجل ما اطبع الف بوسه
فوق اديكى
واعتزرلك عن شقاوقى
الف بوسه فوق مداسك
عشتى شهدك تسقيهولنا
تملى لينا وتنسى كاسك
ربنا يقبل دعايا
لما تبقى الجنه دارك
والملايكه تبقى ناسك
والثياب من سندس اخضر
من كفوف رجلك لراسك
والولاد الخالده طايفه
ولكيزان الفضه شايله
وبعنيكى تكونى شايفه
وشربه من على حوض نبينا
اللى جاد بشفاعته لينا
ومن هوال اليوم حامينا
وتبقى امنه وما انتى خايفه
يا اللى ريحتك تمرحنّه
تحت رجلك نلقى جنّه
يوم ما ترضى يا حبيبتى
رغم بعدك مهما غبتى
او فى يوم لمتى وعاتبتى
الرضا من المولى منّه
من سنين 30 واكتر
غبتى عنى
ولسه عايشه جوه منى
ولما افرح
وابفى مش عارف
اعيش الفرح وحدى
وابقى مشتاق ليكى جمبى
افضل اجرى واقول يا امى
افتحى دراعك وضمى
ابقى شايفك رغم بعدك
ببقى سامعك رغم صمتك
قلبى حاسس بيكى كلك
وبرموشى املى عينى
من ملامحك
عشت اتمنى رضاكى
لو يكون العمر جمبك
الفراق مكتوب علينا
والقدر شفناه بعنينا
لا اختيارنا ولا ب إدينا
كان جواب لمنادى ربك
رحمه الرحمن عليكى
جنته من بين ايديكى
لو هصوم العمر كله
مش هنولها الا برضاكى
وتحت قدمك
ايوه بيكى
انتى يا امى
************
بقلمى {} هشام عبد الجواد مشالي {}
ليست هناك تعليقات:
إرسال تعليق